اوکاڑہ میں ڈاکوؤں کی فائرنگ، ایلیٹ فورس کا ایک جوان شہید

پنجاب کے شہر اوکاڑہ میں ڈاکوؤں کی فائرنگ سے ایلیٹ فورس کا ایک جوان شہید ہو گیا، جوابی فائرنگ سے 2 ڈاکو ہلاک ہو گئے۔

اوکاڑہ تھانہ صدر کے علاقے کورٹ باری کے قریب پولیس مقابلے کے دوران ڈاکوؤں کی فائرنگ سے ایلیٹ فورس کا جوان اسد جمیل شہید، جب کہ 2 ڈاکو ایلیٹ فورس اور پولیس کی جوابی فائرنگ سے ہلاک ہو گئے۔

کورٹ باری کے قریب ڈکیتی کی واردات کے بعد ڈاکو فرار ہو رہے تھے کہ پولیس اہل کار پہنچ گئے، ایلیٹ فورس کے جوانوں نے فرار ہوتے ڈاکوؤں کا تعاقب شروع کر دیا، جس پر ڈاکوؤں نے سیدھی فائرنگ شروع کر دی، جس سے ایک جوان موقع پر شہید ہو گیا۔

جوانوں کی جوابی فائرنگ سے فرار ہونے والے دونوں ڈاکو ہلاک ہو گئے۔

واضح رہے کہ ان دنوں اوکاڑہ میں دو بچوں کے لرزہ خیز قتل کا معاملہ بھی سرخیوں میں ہے، گزشتہ ہفتے اوکاڑہ کی رحمان کالونی میں دو معصوم بچوں کو پڑوسیوں نے اغوا کرنے کے بعد زیادتی کر کے قتل کر دیا تھا، اور ان کی لاشیں نہر میں پھینک دی تھیں۔