بھارتی حکومت کی سرپرستی میں جاسوسی کی مذمت اور اقوام متحدہ سے تحقیقات کا مطالبہ کرتے ہیں: دفترِ خارجہ

 اسرائیلی سافٹ ویئر کے ذریعے جاسوسی کے معاملے پر ترجمان دفتر خارجہ کا کہنا ہے کہ بھارت نے اپنے ملک کی شخصیات سمیت دیگر ممالک میں بھی فون ٹیپ کیے۔

بھارت کی جانب سے صحافیوں، ججز، سفارت کاروں اور حکومتی حکام کے ٹیلی فون ہیک کرنے سے متعلق عالمی میڈیا کی رپورٹ پر پاکستان نے تشویش کا اظہار کیا۔ ترجمان دفترخارجہ کا کہنا ہے کہ پاکستان بھارت کے اس قدام کی شدید مذمت کرتا ہے، پاکستان اس سارے معاملے کا سنجیدگی سے جائزہ لے رہا ہے۔

ترجمان نے کہا کہ بھارت کی جانب سے وزیراعظم عمران خان کا بھی فون ٹیپ کیا گیا، آر ایس ایس کی تعلیم پرعمل پیرا ہو کر بھارت ایسے اقدام اٹھا رہا ہے۔

دفترخارجہ کے مطابق دنیا بھارت کے ایسے چہرے کو پہلے ہی ای انفو لیب کے ذریعے دیکھ چکی ہے، اقوام متحدہ ان معاملات کی تفتیش اور بھارت کا چہرہ بےنقاب کرے، بھارتی حکومت کی سرپرستی میں جاسوسی کی شدید مذمت کرتے ہیں، اقوام متحدہ اور متعلقہ اداروں سے تحقیقات کا مطالبہ کرتے ہیں۔

‘جاسوسی عالمی اصولوں کی خلاف ورزی ہے، پاکستان بھارتی وسیع البنیاد ریاستی جاسوسی آپریشنز کی پرزور مذمت کرتا ہے، اختلافی آوازوں کی جاسوسی آر ایس ایس اور بی جے پی کا پرانا نصاب ہے’۔

دفترخارجہ کے ترجمان نے یہ بھی کہا کہ مقبوضہ کشمیر میں انسانیت سوز مظالم اور پاکستان مخالف پروپیگنڈا بھارتی ایجنڈا ہے، دنیا نام نہاد بھارتی جمہوریت کا اصل چہرے سے واقف ہے، ہندوستان سے متعلق انکشافات پر انتہائی قریبی اور گہری نظر ہے۔ پاکستان، بھارتی زیادتیوں پر مناسب عالمی فورمز کی توجہ مبذول کرائے گا۔